A artista da parroquia de Loxo (Touro) Ana Santiso está deixando a súa pegada artística nun mural na oficina de información turística desta localidade. En concreto, a obra lucirá nun dos laterais do edificio.

Tal e como indica a propia muralista, que xa ten máis de 15 anos de experiencia nesta arte, con esta obra en Touro comezou o pasado luns e é moi probable que a vindeira semana xa se poida ver completa. A temática elixida é o Entroido que se vive neste municipio, sendo un dos grandes atractivos turísticos. Así quedará plasmado o Entroido dos Xenerais da Ulla, onde ilustrará o mural con distintos personaxes típicos desta celebración. “É un tema que me gusta porque eu vivo este Entroido dende pequena”, resalta Santiso.


Cabe mencionar que a través dunha subvención de Turismo da Xunta de Galicia, o Concello de Touro rehabilitou unha edificación municipal, situada no núcleo de FonteDíaz para destinala a oficina de Información Turística. Esta edificación foi usada durante os últimos 30 anos como almacén pola empresa privada concesionaria do servizo municipal de augas, sen ningún tipo de contraprestación ou beneficio para o concello. Agora o goberno local recuperouna para o uso público.

A oficina estará aberta ao público de martes a sábado, atendida por unha técnica informadora turística contratada con financiamento da Deputación da Coruña.