O goberno municipal levará hoxe a pleno a aprobación dun paquete de obras por un importe total de 295.806 €, financiadas con cargo ao Plan POS Adicional 2/2025 e cunha achega complementaria do Concello, tras o acordo alcanzado entre o grupo liderado polo alcalde Jesús Reboredo e o concelleiro non adscrito Darío Rey.

As actuacións previstas permitirán mellorar diferentes espazos e infraestruturas municipais, dando resposta a demandas veciñais e contribuíndo a seguir avanzando no benestar da veciñanza. Inclúense obras estratéxicas que facilitan a comunicación con núcleos de traballo ou servizos.

Entre os proxectos inclúese a mellora da estrada de Grixó, que permitirá que os traballadores de todo o concello que prestan servizos en Camporrapado volvan a utilizar esta vía, acurtando notablemente o traxecto. A intervención en Tribás, ademais de atender aos veciños dese núcleo, tamén beneficiará aos de Arinteiro e Torreis, e inclúe, xunto co tratamento asfáltico con aglomerado, a construción dun pozo e dun sumidoiro para mellorar a drenaxe.

Outra novidade destes proxectos é que o formigón empregado en contornos naturais será de cor ocre, co obxectivo de adaptarse mellor á contorna e respectar o carácter paisaxístico das zonas.

Estas obras acometeranse a finais de inverno e comezo da primavera. O vindeiro mes de outubro, o goberno levará a pleno outro paquete de intervencións urxentes, como a mellora da captación municipal de auga, o arranxo da piscina e outros proxectos estratéxicos para o concello. A pesar de aprobarse con carácter posterior, poderán sacarse a concurso mesmo con anterioridade, ao ser financiadas con remanente, o que simplifica notablemente a tramitación burocrática.

Obras incluídas no proxecto:

• Ponte Remesquide

• Acceso ao campo de fútbol municipal 

• Pista Cruz Méndez – Tribás

• Acceso interior de Cillobre

• Pista de Grixó

• Camiño de acceso ao lavadoiro da Muíña

• Camiño interior no núcleo de Obra

• Pista da Gordela – Turces

• Pista Quintáns – Prevediños

• Pista Vilanova – Loureda – Louredela